المحطة جريدة إليكترونية شاملة
كتب – محمد السمان
– طبيعة علاقة موسيماني و صن داونز كان متوقع يكون ليها مميزات و ليها عيوب ..فنية و نفسية .. للاسف احنا نصيبنا منها كان تقريبا كله عيوب و سلبيات بس .
– شوط اول ابتدى كويس لمدة ربع ساعة من ناحية التمركز و الضغط و بعدين توتر غير مبرر حتى تسجيل الهدف الاول .
– شوط تاني اختفت فيه شخصية الاهلي تماما و اللي ما يعرفش هيفكر الماتش بيتلعب في جنوب افريقيا .
– اصعب ماتش للأهلي في كل مواجهاته مع صن داونز لان كان واضح قوي انهم عارفين و حافظين دماغ موسيماني كويس.
– موسيماني اهتم في تكتيكه في اللعب على نقاط ضعف صن داونز اكتر من اعتماده على نقاط قوة الاهلي .
– كورة صن داونز اللي جت في العارضة كانت عاملة زي المياه الساقعة اللي نزلت على دماغ لعيبة الاهلي فوقتهم لحد ما جابوا الجون .
– مشكلة كبيرة في تعامل دفاع الاهلي مع الكور العالية خصوصا في الكور الثابتة و من دلوقتي لو المشاكل دي ما تعالجتش صن داونز هيسجل منها هناك في ماتش العودة .
– سر من اسرار النتيجة بعد توفيق ربنا الشناوي و اليو ديانج .
– مستوى السولية علامة استفهام كبيرة بالنسبة لي
– امسك و اتشعبط جامد يا صلاح .
– من فترة قولت حسين الشحات مش هيديك احسن حاجة عنده طول ما هو شايف انه بيلعب اساسي حتى في اسوء حالاته و في ناس زعلت من الكلام و النتيجة اهي
– نصيحة يا طاهر خلي الرباط على دماغك حتى بعد ما تخف
– حكم ضعيف جدا لا يليق باهمية المباراة .
– مباراة ربع نهائي اهم بطولة في القارة التي ينتمي لها محمد صلاح و رياض محرز .. بدون فار … لا تعليق
في النهاية خلص شوط اول و لسه في شوط تاني اقوى في جنوب افريقيا .. مع فريق قوي ما عندوش حاجة يبكي عليها..
و اتوقع ان شاء الله ان الاهلي هيظهر افضل من النهاردة .. يا ريت الجهاز الفني يلحق يعالج السلبيات .. و يكون جهز ملك الحلول معلول
و ان شاء الله هتكون قربت و قطعنا شوط كبير جدا و العاشرة_ممكن
