المحطة جريدة إليكترونية شاملة
بقلم سلوي محسن
الحياة اللي احنا عايشينها عبارة عن مجموعة علاقات داخلة في بعض و متشابكة .. علاقاتنا مع الناس و الكائنات و الحاجات و المعاني..
نوعية و جودة حياتنا هي محصلة علاقتنا دي مش اكتر ولا اقل .. بس مش ده المهم هنا بقى ان أهم علاقة في كل مجموعة العلاقات دي هي علاقة كل واحد فينا “بنفسه” العلاقة الوحيدة المستمرة طول حياتك .. الشخص الوحيد اللي هيفضل ملازمك و لا يمكن تفلت منه في أي لحظة في عمرك ! زعله بيزعلك و سعادته بتعديك.. العلاقة الوحيدة اللي هتنعكس على كل علاقاتك التانية ..
لو علاقتك بنفسك مش تمام، ده هينعكس على علاقاتك التانية في صورة تردد و حزن و شكوى و لوم و عتاب و احباط و اوقات اكتئاب! و لو علاقتك بنفسك تمام هينعكس على علاقاتك التانية في شكل ثقة و كاريزما و جاذبية و راحة و في الاغلب سعادة ونجاح ان شاء الله
كله بيبدأ من جوه .. حتى اللي مش مظبوط بره، برضه مفتاحه جوه..
إعمل وقت مخصص لأهم حد في حياتك.. اقعد مع نفسك و اكتب و فكر و حاول تلاقي اجابات للاسئلة دي؛ انا عايز ايه؟ و محتاج ايه عشان اوصل للي انا عايزه ده ؟ ايه اللي بيريحني و ايه اللي بيتعبني ؟
مين و ايه اللي بيشجعني و مين اللي بيكسرني ؟
و اما تخلص خد قرارت جريئة.. حتى لو حتبدأ بقرارات صغيرة
حتى لو هتضطر تبدء من جديد..!
