معاني كلام .. شعر – ميادة الشربيني

معاني كلام

ف الدنيا كتير بنعيش أوهام
وكتير ف سكوتنا معانى كلام
وان قولنا حاجات مش جوانا
ف مكانها بنحي جراح وآلام
فيه كلام إحساسه يعلينا
وكلام يكسرنا وينهينا
وكلام تأثيره يغيرنا
وكلام نبني
ب حروفه أحلام
يتبنى على كلمه ثقه وثبات
وفيه كلمه تهز سبع سموات
وبكلمه وجع عاش جوه القلب
لحد القلب
ما مات ف سلام
واهو كله كلام
ف كلام ف كلام
الكلمه
مش تكوينها حروف
الكلمه دى فرح وجرح وخوف
قبل م تتكلم جرب شوف
ممكن تأثيرها
يكون إعدام
ف قلوب بتموت قبل مبتعيش
وقلوب صابره وأحلام متجيش
ياجبال أوهام أقفى متعليش
وكفايه بقى نبنى على كلام
ماهو كله كلام
فكلام فكلام
طب ليه نسمع لكلام ووعود
نسعى على الحلم و شد العود
لو لحظه نلاقى الباب مسدود
بطموحنا نفتح أى إقفال
نحلم نتمنى نحب نعيش
م حرام العمر يضيع بقشيش
إصرار وقرار و هدف نختار
بين كلمه وكلمه حياه بتنهار
فبلاش تقف الدنيا
على كلام
بقلم ميادة الشربيني