المحطة جريدة إليكترونية شاملة
للشاعر ابراهيم الشبراوي خضر
الخميس 22/9/2022
كنت جني . وابن أيه
اللي يزعلني أطلع عنيه
وأنادي ركس . كاتشو عليه
كنت عيوقــــــــه
وبعمل شعري كاريه
وأول ولد في البلد . لبس دنجريه
وجزمة ظلط . وبجامة كستور
وكنت ألـــــــــــــف وادور
بالساعة والخاتم
وادلدل المنديل
وإن جه علي الليل
.أنـــــــــــــــــادي
أماا اسرجيلى النور
كنت أمور وكنت أكيل
أمسك التعريفة
اجيب باللي جابك ايه
خد الجميل ياحلاوة ؟
هريسة أو بقـــــلاوة ؟
ولا حلاوة نيفـــــــــــــا ؟
أكل بها ثمنية،ولا سكرنبات !
أشتري حمصية، ولا غزل البنات !
أكل مهلبية ولا أشرب بيها شربات؟
أاجر بيها مايوه وانزل بيه الميا
كنت عفريت قوي قوي
وابن جنيــــــــــــــــــــــــــة
لعبت اللجم ،والعقلة والمدراب
وحاربت بالدبور وبالطيارة الغاب
وكنت أكرالشراب واعملبه لفة خيط
وأصيد البقير ب إلفخ والمخيط
وأصيد الوقارة ب إلكوب والسنارة
وكأنها بطحوش
انا كنت جينتل قوي وبشخشخ ب الفلوس
الكل بيلاغيني صباحين وحته يابوص
كنت، خشب البنات، والواد العجوز
أضحك ع العيال
اللي بيلعبوا بكزوز وفرد ولا ؟ جوز
وبيلعبوا سويسية
انا كنت أشد الدبارة
وأكسب
قرش في العسلية
وأبدل الفتوتة بطبق كوسكوسية
وأركب البكاش مرة، بتعريفة
وعشر مرات ببلاش
ويقولي يابن الايه انت بتضحك علي
م العيد إللي فات
انا كنت بتاع سينمات
ريو.ريالتو الشرق أو فريال
يا إماالحرية ياماجيستك ياالكرسال
وكنت ألم العيال أحكي لهم الفيلم
ونلعب ركبتوا خلولها أو واحد ولم
ولو لعبنا شندر
يلفوا الدنيا علي وانا نايم.في البيت
اناكنت عفريت وغاوي ألقعدة ع القهاوي
فريال.ياقهوة السلاكاوي
يا قهوة البحرية
كنت عفريت وابن جنية
مياح ونطيط وصحبجي م الصحبجية
واجدع ولد في الحارة
يرقص بمبوطية
واشخلل بالمعالق
وادندن ع السمسمية
انا بورسعيدي أصيل يابني
مع اني م المطرية
وكنت جاي أمس
فروحت متخن صوتي
وعملت لروحي حس
