المحطة جريدة إليكترونية شاملة
كتبت – فاطمة السيد :
قالت الفنانة زينة : “المناسبات بتقلب علينا المواجع وجدتي كانت بتقول على طول كده ووالدي أيضًا كان بيقول الجملة دي وما كنتش مصدقاها”
وتابعت : “شهر رمضان من غير أبويا الله يرحمه صعب أوي وهو كان بيعمل أكل حلو أوي، وكان بيعمل صينية بطاطس في الفرن والأرز وعصائر، وكان بيعمل العرقسوس في البيت وكان بيعرف يطبخ كويس أوي مع إنه كان مهندس طيران إلا أنه من كتر ما كان بيحبنا أتعلم إزاي يعملنا أكل ومش قادرة أقعد على السفرة من غير أبويا، ولا أملك إلا الدعاء له ،لما بخش على العيد بعد رمضان بفتكر ذكرياتي مع أبويا والعيدية وبحاول أعدي وأبسط الناس اللي حواليا رغم وجعي، أنا ورثت منه حاجات كتير بس كنت الأول عندي أنانية فظيعة وطول الوقت عايزة وعمري ما فكرت اللي حواليا عايزين إيه ولا فكرت في إخواتي ولا أصحابي بعد وفاة أبويا بقيت زيه بالظبط أحب أبسط اللي حواليا ومركزة في الاهتمام باللي حواليا “
وأضافت : “أبويا كان إنسان مفيش زيه وعمري ما هوصل لشيء صغير من الخير اللي كان بيعمله، أنا بعمل كل حاجة بحب علشان أبسط اللي حواليا ومش بحب حد زعلان عايزة لما أمشي أسيب ذكرى حلوة في حياتي للناس القريبين وما يهمنيش الناس الأشرار خالص “.
