«أول طريق التعافي» 

بقلم- سلوي محسن 

– التعافي مهمه صعبة جداً وأكثر صعوبة علي الشخصيات الحساسة من يشعرون بشدة ويتأثرون سريعاً

 

– عمر التعافي ما هيبقي مهمة حد غيرك بس عشان تتعافي صح وبأسرع وقت لازم تفهم

 

– تفهم إن كل حاجه بتحصل في حياتنا مؤقته وإلي زوال الحزن، الفرح، الألم، الفشل النجاح، الصدمات

الحياة نفسها مؤقته كل حاجه في حياتنا ليها فترة ولازم تنتهي

 

– بعد أي أزمة بتمر بيها تبدء مهمتك بقي.

وهي الخروج من الأزمة إنك مطولش الفترة دي علي نفسك وبالأخص الفترات السيئة.

 

– حاول إنك تتخطي تجربة سيئة مريت بيها او موقف أثر عليك بالسلب او كلمه جارحه أو حزنك علي شيئ ضاع منك

يمكن الشئ الوحيد إللي بنتخطاه بصعوبة وممكن منقدرش نتخطاه اصلا هو الموت.

موت شخص كان وجودة حياه بالنسبالك.

لكن أي خسارة تاني سهل تتعوض وحتي لو متعوضتش

الحياة لازم تمشي

 

حاجات لازم تبقي علي يقين منها عشان تتعافي أسرع

 

– ثقتك بربنا إنه قادر يغير كل شئ بين يوم وليله ودعائك بإلحاح إنه يربط علي قلبك وتقبلك إن كل إختيارات ربنا كلها خير.

 

– رضاك عن كل حاجه بتحصل وهتحصل إقتناعك إن كل شئ مقدر وإنك لازم تسلم بالمكتوب بس لازم تكمل وتعافر مش تستسلم وتيأس بيسهل عليك إنك تتعافي أسرع

 

– إدراك إن كل حاجه في الحياة إلي زوال وإن كل مشقه وتعب وحزن وألم ليهم أجر.

 

– التغيير… مينفعش مثلا ابقي عاوز اروح مكان مهم وامشي من شارع عارف إن أخرة حيطه سد أو كله مطبات صعب إنك تغير المكان إللي عاوز تروحه بس سهل إنك تختار شارع تاني يكون ممهد

متغيرش هدفك بس غير خطة الوصول

 

– لما تمر بأزمه او صدمه او تجربة صعبة متمشيش توزع جرحك عالناس وتقول انا موجوع اكتفي بإتنين تلاتة يكونوا مصدر أمان وثقة ليك لو محتاج تفضفض عشان ترتاح اتكلم معاهم وتأكد إنهم هيحتوك مش هيوجعوك زيادة ولا طول الوقت هيقطموا فيك مش مهم إنهم يكونوا هيحلوا معاك بس يكفي إنهم يسمعوك.

 

– أعمل لنفسك أوقات عزلة تقعد فيها مع نفسك تراجعها وتحاسبها وتطبطب عليها كمان حتي لو كنت مخطئ بلاش تقطع فيها وتلومها لإن اللوم مش بيصلح الأخطاء.. متبقوش قاسيين علي نفسكم كفاية قسوة العالم.

 

– لازم تفهم إن إللي أخطأ في حقك مرة وعدتها هتبقي مستباح بالنسباله لو ماخدتش موقف.

 

– مش كل الناس وحشة بس خد حذرك من كل الناس.

 

– المسافــــــــــــــــــــــــات

في اي علاقة هي صمام الأمان.

 

– الإكتفاء عود نفسك ديما إنك في اي وقت ممكن تبقي لوحدك.

 

– نفسك تستاهل إنك تحبها وتخاف عليها وكمان تراضيها.

 

– اوعي تسعي إنك تدور علي رضا الناس لإن الناس عمرها ما هترضي.. دور علي رضا ربنا وبس

 

– سلم بإن أي شئ فاتك مش مكتوبلك وإنه أكيد خير

 

– التعافي محتاج مجهود وتعب اوعي تيأس خلي عندك إرادة لإنها اهم خطوة في طريق التعافي