المحطة جريدة إليكترونية شاملة
كتبت رنا حسين
كتير مننا ممكن يعيش و يموت من غير ما يقابل صاحب واحد بجد .
صاحب يلاقي فيه الضهر و السند و العيلة والكون كله ، الصاحب دة ولا كنوز الدنيا كلها تكفيه ولا تساويه .
الصاحب هو رفيق الطريق مش لازم تكون دماغكو واحده ولا سنكو واحد بس دايما مكملين بعض حد المخ و التاني العضلات .
حد هادي و عاقل و التاني مجنون و طايش دايما في انسجام بينهم ، حد يشد و حد يرخي ، حتي وقت المشاكل هتلاقي دايما الطرفين واخدين بالهم اوي انهم ما يوجعوش بعض مايهنوش بعض ولو حصل صدر اي حاجة عكس كدة هتلاقي الطرف التاني اخد وقته في الزعل و سامح بس الاهم ان الغلط مايوصلش لمعايرة و إفشاء الاسرار.
الصداقة الي من النوع دة دايمة لان دايما الطرفين عايزين بعض احسن واحسن دايما تلاقي كل واحد يتحمق للتاني لو لقاه في موقف وحش او وضع وحش .
نتكلم بقي لو في كمان شغل بين الصديقين دول هتلاقيهم دايما في كتف بعض طالعين السلم سوا خطوة بخطوة محدش فيهم يسبق التاني.
هتلاقي دايما الطرف الي بيقوم بدور المخ دايما دماغه شغاله وبيفكر ازاي يبروز الشغل ويبروز صاحبه صح ، دايما بيشجعه بيخفف توتره و خوفه ، و الطرف الي بيقوم بدور العضلات دايما عايز يبقي اد ثقة صاحبه وعايز يطلع الشغل صح .. اصلهم واحد .
النوع دة من الاصدقاء هتلاقيهم دايما متفاهمين كل واحد فيهم بالنسبة للتاني هو احساس الامان و هتلاقيهم يفرحو لنجاح بعض ونجاح شغلهم سوا ، دايما هتلاقيهم كيان واحد متماسك .
لو لقيتو الصاحب دة اتمسكو بيه اوي واوعي تخسروه مهما حصل ابدا .
