مشكله وحلها

كتابه/اسماء يمانى

الاحتواء فى سن معين تحتاج كل فتاه لهذا الاحساس وتحاول ان تبحث عليه سواء بداخل البيت او بخارجه .

انا نهى هحكى ليكم مشكلتى بنفسى لعلى تكون باب نجاه لغيرى ويتعلم الدرس فى الحياه يمكن انا ملحقتش اتعلم الدرس ده كنت فتاه ساذجه لاتفقه شئ فى نفوس البشر الطماعه والجشعه كنت فى اولى كليه تربيه لما اتعرفت عليه هو كان سبب دمارى ، ساعات بقول لنفسى كتير لو رجعت للماضى تانى كنت اتعرفت عليه ولا شوفته لكن ساعه القدر بيعمى البصر فعلا كنت معميه عن كل حاجه لما شفته ،

فى يوم كنت خرجا من الكليه انا والبنات ساعه عصريه وكل واحده روحت بيتها وكان بيتى انا ابعد مشيت الطريق لوحدى ولسه هعدى الشارع لقيت عربيه جات مره واحده خبطتنى اغمى عليا محستش بنفسى غير وانا فى المستشفى هو جنبى وعماله يعتذر ليا على الى عمله كان شاب فى اواخر الثلاثين وانا كنت ساعتها بنت ١٩سنه فضل يعتذر ليا كتير ومكنتش اصابتى جامده كانت خفيفه وعرض عليا يوصلنى بدل مااهلى يقلقوا عليا وفعلا وفى الطريق اتعرفنا على بعض اكتر وعرفت انه مهندس كبير ومن عيله غنيه ووصلنى لغايه البيت ولما وصلت البيت مرضتش اعرف اهلى الى حصلى عشان ميتخضوش عليا وقولت ليهم وقعت من على سلم الجامعه وتانى يوم جيت انزل لقيته مستنينى بالعربيه وفضل ماشى ورايأ كتير وفجاه وقف وقالى ايه مش شيفانى

قولته عايز ايه

قال. اوصلك انتى شكلك لسه تعبانه متخافيش انا مش هاكلك وبدل وقفتنا فى الشارع ،كده وافقت بعد محايله كتير منه وفى الطريق اتعرفنا على بعض اكتر وخدنا ارقام بعض عشان لو احتجت حاجه ، وبعد كده بقى يكلمنى على اقل حاجه ويفتح معايا اى موضوع وبدأت اتكلم معه هتقولوا ليه عملتى كده هقول الاحتواء كنت محتاجه حد يفهمنى اوى يحتوينى يحبنى كنت صغيره حبيته جدا رغم فارق السن ، بقينا نخرج ونشوف بعض فى الفتره ديه اهملت دراستى وبقت اهتم بيه اوى واهلى لحظوا التغير ده وبدأ يدققوا عليها فى الطلوع والنزول وحصل ساعتها مشاكل كتير بسببه وانا كنت زى المسحوره بيه مش عارفه ليه ،

وبعد فتره بابا تعب اوى ومات ،وانا دخلت فى حاله حزن كبيره واكتئاب وكان هو ملجى ساعتها فى يوم خرجت حزينه جدا وكلمنى وقالى انتى فين عايز اشوفك تعالى فى مكان معين كان واقف بالعربيه وركبت معه وجبلى عصير عشان يهدينى ويقولى متزعليش وكلام كتير عشان يواسينى وشربت ساعتها حسيت اني دايخه ومش قدرا اتحرك واغمى عليا

لما فقت لقيت نفسى عنده فى البيت ،بقوله هو في ايه اللي حصل والى جبنى هنا قالي مافيش حاجه انتي نمتي وجبتك معايا هسيبك يعني في الشارع

قولتله طب انا عايزه امشي قالي علي فين خليكي معايا هنا قولت له لا انا هرجع البيت مينفعش ابات بره البيت اهلى هيقلقوا عليا قالي مافيش خروج غير لما تقعدي معايا شويه رفضت وزعقت معاه. لحد ما صوتي بداء يعلي قالي انا هعرف اخليكي تهدي وتسكتي ازاى ولقيته طلع منديل فى مخدر من جيبه وشد ايدى وحطه على وشى محستش بحاجه ساعتها وبعد فتره فقت لقيت نفسى نايما على سرير بصتلة نظره خوف قالى متخافيش معملتش فيكى حاجه انا بس حبت اعرفك انى لو عايزك هعرف اجيبك ماشى ياحلوه ، اتصدمت منه قولت انا ازاى مشفتش الشيطان الى قدامى ،ساعتها قولتله انا هفضحك وعلى الله اشوفك تانى ، لقيته بيقولى متقدريش والفيديوهات الى معايا مصورك وانتى نايما وكنت قاعد جنبك عشان الناس تفتكر حاجه شوفتى اقدر اشوه سمعتك ازاى انتى متقدريش عليا وحياتك هتبقى جحيم من هنا ورايح اترجته ساعتها قولتله انت بتعمل فيا كده ليه هو ذنبى عشان حبيتك ، قالى مانا بحبك بس بطريقتى انتى بالنسبه ليا لعبه اتسلى بيها وقت مااحب ، ومش هديكى الفيديوهات هشيلها لوقت احتاجه فيه عشان اضمن انك عمرك ماهتكونى لحد تانى وهفضحك قدام اهلك لو اتكلمتى ،

قولتله انت بتعمل فيا كده ليا حرام عليك مش عايزه اشوف وشك تانى ، وسبته ونزلت اجرى فى الشارع مش عارفه اروح فين ولامين وحياتى ادمرت بسبب وهم انا اتوهمت بيه باسم الحب ، ومش قدره اقول لاهلى هقولهم ايه وبعد صدمه بابا ووفاته ، انا ادمرت فعلا وسبت الكليه وبقت حياتى جحيم وعشان يغظنى اكتر ومعرفش اتواصل معه عملى بلوك عشان يعرف يظهر ليا امتى مايحب ، لو كان حد قالى ان البنادم ده الى شوفت منه الحب ده كله هيعمل فيا كده مكنتش صدقت ، انا بس بعتالك قصتى عشان تكون موعظه لكل بنت عن اى حد يحاول يتستغل ضعف البنت اللي قدامه لاي سبب من الاسباب ديه نصيحه ليهم بلاش تكرروا غلطتى مترحوش لاى حد مجرد قالكم كلمه حلوه وادعولى ان ربنا يساعدنى ويبعد الشخص ده عنى وربنا ينتقم منه لانه بيدمر حياتى لغايه دلوقتى ومافيش جديد لحد انهارده بسببه ادعولى حياتى ترجع زى مكانت كان حلمى اكون مدرسه هل اعرف احقق ده لكن حسا ان حياتى وقفت مافيش اى جديد فيها وتهديد مستمر

القصه ارسلت لنا والكاتبه قامت باعاده صياغتها

الحل ”

انتى غلطانه من الاول لانك فتحتى باب من الشيطان اعوذ بالله صعب قفله وغلطانه انك محكتيش لاهلك بالتفصيل وانك تبصى لحد فرق كبير فى السن ارجعى الى ربك واطلبى منه يغفر ليكى ويسامحك الحب ليس حرام حبيبتى لكن لما يكون فى العلن وامام الله واهلك ,اما الحل انك لازم تعرفى اهلك وتكلمى معاهم بهدوء مهما كان رد فعلهم عشان يساعدوكى ويكونوا دعم ليكى وتلجى للمباحث الانترنت وتقدمى فى بلاغ بتهديدك وابتزازك وصدقينى اهلك اكتر ناس هيقفوا جنبك وارجعى لحياتك ومستقبلك وربنا غفور رحيم ومتصدقيش اى كلمه ساعات كتير شياطين فى هيئه بنادمين ربنا يصلح حالك …