ممكن سؤال

سحر أبوالعلا

قالّي ممكن سؤال
بس يعني سؤال رخم
ضحكت و قولتله اتفضل
اصلي بصراحة عارفة السؤال
سألني قالّي سنك كام؟
و بكل صراحة رديت
ما انا سني عمري ما خبيته
و قالّي ياااااااه
تفتكري كنت فاكرك كام
و سألته كام؟
اداني فوق سني يجي 16سنة.
سألته ليه؟
قالّي حاسس جوة منك حاجات كتيرة
حزن على شوية توهة و كتير حيرة
و لقيت نفسي بجد في حيرة
ازاي كدة ؟
من كلمتين و حتي كمان من غير لقا
تلاقي حد يكون كدة
و ناس كتير عشرة سنين
تديك اقل من سنك يجي عشرين سنة.
اصل اللي شاف غير اللي حس
من برة شكل عايش تمام
من جوة روح بتقول سلام
و ما بين تمام و بين سلام
يجي مية سنة.