المحطة جريدة إليكترونية شاملة
من الحاجات اللي حتلاحظها في زيارتك لسانت كاترين هي صورة العجل المنحوت في الجبل في وادي الراحة و في حكايتين لسبب تسمية الوادي ده بالاسم ده
الحكاية الاول بتقول انه اتسمي بوادي الراحه لان بني اسرائيل استراحوا فيه تحت الجبل لحد ما سيدنا موسي ينزل من فوق الجبل بعد تلقيه الالواح و الحكاية التانية بتقول ان سيدنا موسي ترك فيه اهله يستريحوا لحد ما يروح ناحية النار يأتي لهم منها بقبس عشان يدفوا منها ، مفيش طبعا حد يقدر يأكد انهو معلومة هي المؤكدة لكن الاكيد انك هناك حتحس براحه غريبة لان فعلا المنطقة دي قيها روحانية عالية اوي
نرجع بقي لقصة تمثال العجل ده .. ايه بقي الحكاية بالظبط ؟
طبعا القصة الاشهر و الاكيدة هي اللي ذكرها القرآن الكريم وانا هنا حستعرض بعض القصص اللي بتتناقلها بعض الروايات و الاساطير عن الصورة دي من باب المعرفة بيها و ليس الايمان طبعا فلا ايمان الا بما ذكره الله في القرآن من قصة العجل الذهبي و السامري
القصة الاولي بتقول ان النقش ده هو تمثال للعجل اللي صنعه بنى اسرائيل عشان يعبدوه بعد ما سيدنا موسى اتأخر فوق الجبل و افتكروا انه مات وبعد عودة سيدنا موسى تم تحويله الى حجر
القصة التانية بتقول إنه كان قالب العجل اللي استخدمه السامري يعني استخدم شكل العجل المنحوت في الصخر كنموذج أو قالب لصناعة العجل الذهبي اللي عبده بني اسرائيل
القصة التالتة بتقول أن سيدنا موسى لما نزل من الجبل و اكتشف ان قومه يعبدون العجل فلطم العجل بأيده فلصقه بالجبل فنتج هذا الاثر الباقى لزمننا هذا عبرة لنا وتجسيد لما حدث ايام سيدنا موسى
في رأي بقي لبعض الباحثين بيقولو ان من الناحية الأثرية لا يوجد ما يثبت القصص دي اثرياً، و اننا لو نظرنا فى جبال سيناء أو جبال سانت كاترين حنري الكثير من التكوينات الصخرية على هذا الشكل، فممكن أننا نشوف نحتا على شكل طير أو جمل بسبب طبيعة المناطق الصحراوية وان السبب في التجويفات دي هي مياه الامطار و العوامل الجوية اللي اتسببت في نحت الجبال بالشكل ده
غريبة هي سيناء و مليئة بالغاز كتير و مع الايام بتكشف عن كنوزها الدينية و التاريخية
بس مش غريب ان يكون في نحت لعجل في جبل في نفس المكان المرتبط بقصة عجل ذكر في القرأن و التوراة حتي لو كانت العوامل الطبيعية او المناخية سبب فيه
حنتكلم كتير عن #سانت_كاترين و وادي الراحة و جبل الطور كفاية بس انك تعرف ان المكان ده من اقدس و اطهر البقع علي الارض .. اه زي ما بقولك كده .. عارف ليه ؟
لانه المكان الوحيد اللي ربنا تجلي فيه و ظهر نوره علي الارض
