بقلم الشاعر محمود السعيد عبد الهادى
تعبت ياناس من الفقر والله وسنينه
لا شوفت طعم الدفا فيه ولاحتي في أمشيره
غير نوم علي البلاط والتلج حاسينه
ملعون أبوك يافقر وحتي اللي عاوزينه
مادوقت غير طعم المرار من كاسك اللي شاربينه
ولا شوفت فيك غير ألم في زمانا اللي عايشينه
دا انا دوبت ياناس في قسوته والكل كارهينه
رغم أن قالوا شدوا الحزام وفي بيوتنا شدينه
والكل ياعيني حياري علي الثقب اللي سدينه
دا مشينا جوه الحيط وبعجازنا سندينه
من الخوف علينا يقع ومين بس اللي حيعينه
تعبت ياناس من الفقر وقرفه وسنينه
أخدنا ليه في سكته وبيلم في اللي عارفينه
يمكن العشم واخده تقولش عاشقينه
مالقينا ليه من دوا ولا كشف شايفينه
والعمر خلاص ضاع في وهم عاشينه
ولا فارق أيه باقي ماعودنا حاسبينه
أمتي ياناس نرتاح من الفقر وأنينه
ونحس بطعم الفرح اللى إحنا ناسينه
يمكن يعود الأمل اللي أحنا فقدينه
ملعون أبوك يافقر وحتي اللي عاوزينه