المحطة جريدة إليكترونية شاملة
بواقي الماضي
كل يوم يطلع جديد
بس بردو الماضي باقي
لسه فينا ناس كتير
عايشه ع الذكرى وبواقي
الأصول الطيبه
والجدع موجود ف حاره
كل شارع فيه تلاقي
المحبه ف كام عماره
دور يهني ودور يواسي
وف المناسبه كتير كراسي
لمة كل الطيبين
أيوه جددنا الأماكن
أيوه بدلنا البيوت
بس بقلوبنا القديمه
عيشنا بيها وراح نموت
أيوه لسه الطبطبه
سايبه جوانا الحنين
ذكرياتنا هونت
ياما جرح من السنين
الحبايب أيوه غابو
راحو فعلاً بس سابو
حته منهم جوه منا
مشجعانا ع الصمود
حاجه فينا مخليانا
نوفي دايماً بالوعود
إللي وصونا عليها
وإتعاهدنا ع الحفاظ
مهما لف زمنا بينا
والجميل فحياتنا باظ
لسه ماضينا حامينا
وذكرياته سانده فينا
عادى لفي يا دنيا بينا
وطلعلنا ف الجديد
بردو ماضينا إللي باقي
واحلى مافينا البواقي
بيها قلوبنا مهما تحزن
بردو جوانا سعيد
شعر – ميادة الشربيني :
