جامع السلطان حسن

كتب – مصطفى قطب :

جامع مدرسه فى ميدان صلاح الدين فى حى القلعه فى القاهرة، مصر. اتبنى فى عصر الدوله المملوكيه ، أزهى عصور مصر فى العصور الوسطى

وبدا بناه فى عهد السلطان الملك الناصر حسن بن محمد بن قلاوون. بيعتبر تحفه معماريه و من أعظم الجوامع فى مصر و على مستوى العالم كله ، وبتجمع مبانيه بين قوة البنا و عظمته و دقة الزخارف البديعه. مدحه المقريزى و مؤرخين غيره ، و بترودى لافييه ، و جومار ، و الرسام لينوار و غيرهم كتير ، واتوصف بانه مالهوش مثيل فى الشرق كله و فخر لمصر.

قال عنه المستشرق العلامه جاستون فييت : ” ده ابدع اثار القاهره و اكترها تجانس و تماسك و كمال و وحده ، و أجدرها انه يكون مع الاثار الروعه اللى بنتها حضارة مصر الفرعونيه ” و انه ” اهم و أعظم من قصر الحمرا فى جرانادا “.

بدأ بنا جامع السلطان حسن فى مارس سنه 1357 فى مكان كان اسمه سوق الخيل على ارض سراية الامير يلبغا اليحياوى نايب السلطنه المملوكيه فى الشام فى عصور السلاطين سيف الدين شعبان و سيف الدين حاجى ، و استمر البنا لمدة تلت سنين من غير توقف. و اتوفى السلطان الناصر حسن قبل ما ينتهى البنا فكمله الامير بشير أغا و تم البنا سنه 1363.