المحطة جريدة إليكترونية شاملة
بقلم- رنا حسين
كام مرة سمعنا عن صديقة غدرت بصديقتها او صديق غدر بصديقه !!
كام مرة قرينا عن جرايم قتل الصحاب لبعض !!
كام مرة سمعنا حكايات عن الغدر والحقد وشر النفوس بين الناس عموما و الاصدقاء خصوصا !!
احنا في علاقتنا مع الناس ربنا بيبعتلنا إشارات وعلامات تدل علي حقيقة حب الاشخاص ديه لينا في ناس بتاخد الاشارات ديه بعين الاعتبار و ناس تانية بتغمض عينها وتكمل و تقول اكيد لا انا الي ظنيت وحش فيهم مثلا ….
طيب ليه لما ربنا يبعتلنا إشارة او علامة قدام عيونا مناخدش بيها ليه نبقي شايفين ان الي قدامنا بيمثل الحب و الصداقة واحنا عارفين دة ونكمل !!
الي بيحبك مش بيأذيك و لا بيجرحك بالكلام .. الي بيحبك عمره ما يهينك .. الي بيحبك عمره ما يشوه صورتك ولا يتكلم عليك ف ضهرك عشان يسوأ صورتك ويطلع فيك ابشع الصفات
الي بيحبك هايتمنالك الخير والنجاح و دايما هتلاقيه اول واحد يسقفلك لما تعمل حاجة ناجحة حتي لو كانت بسيطة واول واحد ايده تدمدلك لما تقع ، مش يتفرج عليك ويمثل انه زعلان ويتمني من جواه انك تفضل واقع علي طول .
الصاحب الي يحبك هو الي لما تكونو متجمعين مع ناس تلاقيه بيقدرك و يبين اد ايه هو بيحبك وانك حاجة كبيرة عنده مش يتريق عليك عشان يبان دمه خفيف قدام الناس .
الصاحبة الي تحبك عمرها ما تخبي عنك حاجة خاصة بيها عشان خايفة تحسديها .
الصاحبة الي بجد عمرها ما تتريق علي حاجة بتعمليها حتي لو شايفة فيها عيب تلفت نظرك ليه انما متتريقش ابدا او تسخر او تقلل من حاجة بتعمليها مهما حصل .
صحاب المصلحة الي اول ما يلاقو بديل يسيبوك دول عمرهم ما كانو صحاب ابدا .
اختارو الصديق الجدع الضهر السند الي بجد مش الي يمثل انه بيحبك وهو بيتمنالك الموت والاذي ولو طال ياخد مكانك مش هايتأخر عن دة …..
اختارو الصاحب الي بجد الي يكون اول واحد معاك ف اي حاجة فرح او حزن او مشاكل .
الصاحب الي من كتر حبه ليك مع الوقت تبقو شبه بعض ودماغكو واحدة .
الصاحب الي يشجعك علي عمل الخير و العبادة و كل حاجة كويسة .
زي ما قال رسولنا الحبيب ( المرء علي ديه خليله فلينظر احدكم من يخالل)
