المحطة جريدة إليكترونية شاملة
خلفتو ؟؟ تمام براڤو بس فين الانجاز في دة !! ديه الحيوانات بتخلف …
الانجاز الحقيقي انكو لما تاخدو قرار انكو تجيبو اطفال للعالم دة تبقو دارسين وعارفين كويس اوي متطلبات الاطفال ديه ايه في مراحل عمرهم المختلفة .
الطفل اساسي انه يحس بالامان والشبع في بيت اهله مش شبع اكل بس يعني مش معني ان ابنك بياكل وبيشرب وبينام يبقي هو كويس و نفسيته كويسة و هايكون عايز ايه تاني ، لا الابناء بيبقو محتاجين كتير اوي محتاجين حنية و حب و امان و احتواء ، ونحط تحت الامان و الاحتواء مليون خط.
الابناء محتاجين يحسو ان امهم صاحبتهم الحنينة الي دايما معاهم و فاهماهم و حاسة بيهم في مراحل عمرهم وفي نفس الوقت عينها عليهم تعاقب و يبقي ليها ردة فعل حاسمة ف الغلط عادي جدا ، ومحتاجين كمان يحسو ان ابوهم سندهم امانهم وحمايتهم من غدر الدنيا ، محتاجين يلاقو ان ابوهم مشبعهم من كل الاحاسيس المعنوية عشان مايروحوش يدورو عليها برة بيتهم .
ولادكو لو مش شبعانين حنية و اهتمام و احتواء و صداقة يبقو ضاعو عشان الله اعلم هايقابلو مين يديهم الي ناقصهم و مقابل ايه !!
ولادكو محتاجين حكمة منكو في التعامل معاهم ، والحكمة ديه مش ف انكو تاخدو قرارات ليهم بدون نقاش و عشان انتو شايفين انها صح تنفذوها طيب مش يمكن انتو غلط !!
فوقو لاولادكو وافهمو يعني ايه خلفة ومسؤليه وصحة نفسية للاولاد ديه ، افهمو ولادكو صح عشان متخسروش في الاخر . ازرعو في المجتمع ولاد اصحاء نفسيا وشبعانين من كل حاجة عشان تجنو و تحصدو زرعة صالحة و كويسة بدل ما ولادكو يضيعو ويبقو ضحايا لناس متعرفش ربنا او ضحايا ليكو انتو شخصيا و تنتهي حياتهم بالانتحار لانهم فشلو ف كل حاجة وفي النهاية انتو الي هتموتو بحسرتكو علي ولادكو .
