الرئيس يستمع لصاحب تريند “الطفاية دي” دخل معرض تراثنا

أخبار المحطة

من حوالي 3 أسابيع انتشر فيديو من داخل أحد قطارات الصعيد واقف فيه بياع فصيح بينادي على بضاعته بطريقة مختلفة ومميزة وبيقول: “الطفاية دي.. الطفاية دي.. الطفاية دي”.. الفيديو انتشر بسبب إعجاب الناس بفصاحة وتلقائية الراجل اللي كان واضح إنه بيحب شغلانته مش بيمارسها غصب عنه أو كده وخلاص.. الراجل البسيط ده واللي معظمكم أكيد تابع حكايته بعد كده اسمه “أيوب القاضي”.. شاب مصري من قرية البحثية في نجع حمادي محافظة قنا.. بعد الفيديو الحكومة منحته قرض لإنشاء ورشة عشان ينفذ مشروعه في صناعة التحف والأنتيكات والطفايات.. والنهاردة “أيوب” كان واقف قدام رئيس الجمهورية “عبد الفتاح السيسي” عشان يستعرض شغل إيده قدام كبار مسئولين الدولة هو وأكتر من 1500 عارض في معرض “تراثنا” للحرف اليدوية والمنتجات التراثية في مركز مصر للمعارض الدولية..

النهاردة الصبح الرئيس “السيسي” تفقد أجنحة معرض “تراثنا”، واللي يعتبر أكبر ملتقى إقليمي للحرفيين والمبدعين ومصممين المنتجات اليدوية لدعم الحرف التراثية اللي بتتميز بيها المحافظات المصرية المختلفة في إطار دعم الدولة للشباب ومشروعاتهم المتوسطة ومتناهية الصغر وتعزيز آليات عرضها وتسويقها..

المعرض بيضم السنة دي 1500 عارض محلي ده غير أجنحة المنتجات التراثية واليدوية من دول من دول الإمارات والأردن والسودان..

من المشاركين في المعرض عارضين من الشباب والسيدات ذوي الاحتياجات الخاصة، والرئيس وقف معاهم وسمع مقترحاتهم وأفكارهم ووجه بتقديم كل التسهيلات ليهم وحل أى عقبات تواجه نشاطهم..

الرئيس كمان سلم جوائز مالية لأفضل 3 مشروعات حرفية وتراثية للقرى على مستوى الجمهورية.. المشروع الأول كان لسيدة من محافظة الفيوم وقيمة الجائزة 50 ألف جنيه، والجائزة الثانية كانت لسيدة م سوهاج قيمتها 30 ألف جنيه والرئيس طلب زيادة قيمة الجائزة لما عرف إنها بتعول 8 أطفال، والجائزة الثالثة فاز بيها شاب من محافظة الغربية..

المعرض هيفتح أبوابه للجمهور من بكره الأحد ولغاية يوم 15 أكتوبر من 11 صباحاً لحد 10 مساءاً..

في مصر ممكن حياة إنسان تتغير 180 درجة في أقل من شهر زى ما حصل مع “أيوب القاضي”.. مش ضربة حظ ولا صدفة لكن بالتخطيط والدراسة.. كل مصري معمول حسابه في دعم الدولة له في كل مجال ومهما كانت فئته.. الكل بيتخطط لتحسين مستقبله وبيتم التفكير في أفضل ما يمكن تقديمه له.. مفيش حد هيتنسي.. في الجمهورية الجديدة حياة كل المصريين كريمة.